ԱՅՆ, ԻՆՉ ՎԱՏ Է ՍԻՍԻԱՆԻ ՀԱՄԱՐ, ԻՄԱՑԵՔ, ՈՐ ՎԱՏ Է ՆԱԵՎ ԻՆՁ ՀԱՄԱՐ

Հարցազրույց Սիսիանի համայնքի ավագանու անդամ Համլետ ԲԱԲԱՅԱՆԻ հետ

-Պարոն Բաբայան, բավականին  բարձր քվեներով ընտրվել եք Սիսիանի համայնքի ավագանի: Ինչո՞վ եք պայմանավորում սիսիանցիների նման վստահությունը Ձեր հանդեպ:
-Երբ առաջադրում էի իմ թեկնածությունը, մտածում էի` ինչ ես դու տվել ժողովրդին, որ իրենք  քեզ ինչ տան: Ես իմ աշխատանքով ապացուցել էի, որ այն մարդն եմ, ով թե նախկինում ավագանի եղած ժամանակ, թե քաղաքապետարանում աշխատելու տարիներին նեցուկ է կանգնել իր ժողովրդին: Քաղաքապետարանում իմ աշխատելու ժամանակ չի եղել դեպք, որ մեկը դիմի ինձ, եւ նրա հարցը լուծում չստանա: Ավագանու մյուս բոլոր անդամների  թիկունքին եղել է ուժ, կուսակցություն, միակ թեկնածուն ես էի, որ որեւէ կուսակցության անդամ չէի, լուրջ ընտրապայքար չեմ ծավալել, քարոզչություն չեմ արել, մարդիկ, ուղղակի կարդալով Բաբայան Համլետ անուն-ազգանունը, խղճի մտոք իրենց ձայնը տվել են ինձ:
-Կարող է` մյո՞ւս Բաբայան Համլետին (Սոկոլ) նկատի ունենային:
-Նախկինում նման բան եղել է, երբ մյուս Բաբայան Համլետը ինձանից բավականին շատ ձայներ էր տարել: Հաջորդ անգամ, երբ երկուսով նորից առաջադրվել էինք, ինքը չընտրվեց, ես ընտրվեցի: Չնայած` նա էլ շատ անաչառ տղա էր: Պարտադիր չէ, որ ֆինանսներից լավ հասկանար, բայց իմ բոլոր առաջարկություններին կողմ է քվեարկել:
– Ներկա ավագանու կազմը համարում են ջահելանոց` թերահավատորեն վերաբերվելով նրա` լուրջ եւ ինքնուրույն որոշումներ կայացնելուն: Ձեր կարծիքը:
– Ես «ջահելանոց» չէի ասի, որովհետեւ կան տղաներ, որ թեեւ նիստերին  չեն խոսում, բայց նիստերից հետո, երբ նրանց հետ առանձին հարցեր եմ քննարկում, տեսնում եմ` ունեն այն մտածողությունը, ինչ` ես, ունեն ասելիք, բայց երեւի թե կաշկանդվում են, որովհետեւ, գիտեք, դժվար է` նույն կուսակցության անդամ լինել, նույն մարդու հովանավորությամբ անցնել ավագանի, հետո նրան դեմ խոսել: Ես դա չեմ ընդունում: Չեմ ընդունում եւ այն, երբ ինձ ասում էին` դու լավրենտական ես, պիտի աշխատանքից դուրս գաս: Ես պատասխանել եմ` աշխատել եմ Լավրենտի օրոք, պիտի պաշտապանեմ  Լավրենտին, կաշխատեմ քո օրոք, քեզ կպաշտպանեմ: Հիմա` այս երիտասարդներինն է: Ինքն է բերել, պիտի…
-Բայց ավագանու անդամը, ըստ էության, իր ընտրողի, իր համայնքի բնակչի շահը պիտի պաշտպանի, ոչ թե` քաղաքապետի:
-Ես համամիտ եմ: Երբ այս քաղաքապետը չլինի, ուրիշը լինի, եւ նրանք թեկնածություն դնեն ու անցնեն, այն ժամանակ կասեմ` իրենք արժանի էի՞ն ավագանի լինելու, թե՞ քաղաքապետը դարձրեց: Մի օրինակ բերեմ. նախորդ տարիներին նույն թաղում Աղայան Կիմը ավագանու թեկնածություն առաջադրեց, ես էլ նրա վստահված անձն էի, հավաքեց ընդամենը 29 ձայն, իր տղան նույն թաղամասում այս ընտրություններում հավաքել է 400 ձայն: Դա չի՞ նշանակում, որ նրա տղան հովանավորվել է: Կարող եմ այլ օրինակներ էլ բերել: Նրանք կաշկանդված են, եւ դա է ողջ խնդիրը:
Ես թոշակառու մարդ եմ, զավակներս ապահովված են, ոչինչ չունեմ, որպես սիսիանցի, իմ միակ մտահոգությունը քանդված, ցեխոտ փողոցներն են: Ես դարձել եմ ավագանի, որ մի բան անեմ, թե չէ` իմ ինչի՞ն էր պետք, որ գնամ քաղաքապետի հետ կռվեմ, դեռ ասեն էլ` էլի խոսեց: Ես եկել եմ ապացուցեմ, որ ժողովրդի համար եմ անում, եթե իրենք էլ կանեն, թող անեն:
Վատն այն է, որ ավագանու անդամների 90 % -ը ՏԻՄ օրենքից ոչ միայն տեղյակ չէ, այլեւ` չեն էլ հետաքրքրվում, նրանց ինչի՞ն է պետք օրենքը:
-Այդ դեպքում` ինչի՞  համար են եկել:
-Չեն եկել, նրանց բերել են:
-Պարոն Բաբայան, Սիսիանի ավագանու գրեթե բոլոր որոշումներն ընդունվում են միաձայն: Այդքան դժվա՞ր է ոչ սրտամոտ, համայնքի բնակչի շահը ոտնահարող առաջարկությանը դեմ քվեարկելը, թե` ամեն ինչ այդպես սահուն ու անթերի է, որ որեւէ մեկը չի առարկում կամ` դեմ քվեարկում;
-Իմ փոխարեն պատասխանեմ. երկու որոշման դեմ եմ քվեարկել: Մեկը եղել է հարկերի բարձրացման դեմ, հիմնավորել եմ ասելով, որ փոխարեն խրախուսենք անասուն պահողին, ով հազիվ է պահում, դեռ 5 հազար դրամ էլ հարկ ենք դնում ամեն անասունի վրա: Մյուսը`  ապրանքանիշերի անվանումների համար օրենքով սահմանվող հարկին: Այսպես` «Սիսիանի կաթ» անվանման համար նախատեսվում էր 100 հազար դրամ, ես դեմ եմ եղել, առաջարկել եմ` նախ 10 հազար, հետո որ կավելանան, նոր կդարձնենք  20: Ենթադրենք ես էլ արտադրողն եմ, ապրանքի անունը կդնեմ ոչ թե` «Սիսիանի կաթ», այլ` «Բռնակոթի կաթ», եւ այդ 10 հազար դրամն էլ կմուծեմ Բռնակոթի համայնքային բյուջե:
Բաներ էլ կան, որին դեմ եմ եղել իրականում, բայց` կողմ եմ քվեարկել:
-Ինչո՞ւ:
-Նպատակային: Դեմ եմ եղել մանկապարտեզների վարձավճարների բարձրացմանը, վիճել եմ բոլորի հետ: Բայց  երբ 4 վարիչներն էլ պնդել են, թե Գորիսում այն դարձրել են 5-6 հազար, ծնողների հետ իրենք խոսել են, եւ նրանք համաձայն են վարձավճարները բարձրացնելուն, միտումնավոր կողմ եմ քվեարկել եւ ասել, որ եթե հաջորդ տարվա բյուջեն հաշվարկելիս  այդ մանկապարտեզներում գումարը 400 հազարով ավելացած չեղավ, ազնիվ խոսք,  բոլոր վարիչներին ազատել եմ տալու աշխատանքից:
– Վարձավճարները բարձրացել են, բայց երեխաները շարունակում են տնից տանել հիգենայի պարագաները, գրենական պիտույքները, մենյուն մնացել է նույնը, մանկապարտեզի աշխատողի աշխատավարձը` նվազագույնը: Վարձավճարը բարձրացնելու նպատակը ո՞րն էր:
-Ես ասել եմ, որ եթե այդքան բարձրացնում են վարձավճարը, գոնե բարի պիտի լինեն երեխային տրվող սննդակարգը ավելացնել:
Էն աղքատ տարիներին, Հովակիմյան Գառնիկի պաշտոնավարման օրոք, որ ոչ դոտացիա կար, ոչ` սեփական մուտքեր, ոչ հարկ ու տուրքի հավաքագրում, մեկ երեխայի հաշվով օրական տրվում էր 162 դրամ, 40 դրամ էլ չգիտեմ որտեղից հայթայթեց-բերեց ու ավելացրեց սննդի վրա ծախսվող գումարը: Սարգսյանի օրոք 260-270 դրամ էր: Հիմա` 122 թե` 220 դրամ է: Ես վիճել  եմ, որ դա չնչին գումար է, Կարենը, էսօրվա տեղակալը,  ասել է` խի՞ երեխաները գալիս են մանկապարտեզ  ուտելու համա՞ր, գալիս են սովորելու համար: Ասել եմ` հարգելիս, երեխան 8 ժամ մնում է մանկապարտեզում, 122 դրամով նրան ի՞նչ եք տալու: Իմ խիղճը տանջում է, որ կողմ եմ քվեարկել այդ որոշմանը, բայց միտումնավոր եմ արել, որ էդ մանկապարտեզի վարիչները պատասխան տան:
-Իսկ տեղական մուտքերից Սիսիանի որեւէ խնդիր լուծվում է՞:
-Սիսիանի դոտացիան 212 միլիոն է, 2 անգամ ավելի շատ է, քան` տեղական մուտքերը, այն 82 մլն դրամ է: Միշտ ասել եմ, հիմա էլ կասեմ, որ Սիսիանի քաղաքապետարանում պիտի աշխատի ոչ թե 36 (նակինում` քառասունքանի էր), այլ, իմ համեստ հաշվարկով, 18-23 մարդ: Դա էլ է շատ: 10 հոգի կրճատելով` մի 17 միլիոն դրամ կխնայվի, դրանով կարելի է տարեկան 1-2 փողոց ասֆալտել: Թող անի ու ասի` տեսա՞ք` արեցի:
-Իսկ ինչո՞ւ չի անում:
-Ով ձայն է տվել, նրան տեղավորում է, ով ձայն չի տվել, նրան հանում է: Այն բաժնում, որտեղ նախկինում  2 հոգի էինք աշխատում, հիմա  5-6 հոգի է աշխատում: Ո՞ւմ է պետք: Քաղաքապետարանի աշխատողները շատ վատ են աշխատում: Գալիս են քաղաքապետարան ներկա ստանալու, աշխատավարձ ստանալու համար: Ոչ մեկը ինքնուրույն դուրս չի գալիս փողոց, մի խնդիր բարձրացնի:
Դուք որ եկաք էդ փողոցով, չընկա՞ք ջրափոսերը:
-Չէ, ես Սիսիանի բոլոր ջրափոսերի տեղը անգիր գիտեմ, հաշվել եմ, նկարել, տպել:
-Հարցեր եմ բարձրացնում, հետո ուրախ-ուրախ գալիս ասում են` Բաբայան, արել ենք, ասում եմ` Բաբայանը չպիտի ասեր է, դուք պիտի անեիք;
-Պարոն Բաբայան, որպես ավագանու անդամ, չեմ կարող այս հարցը չտալ ձեզ. Սիսիանում աննախադեպ ծառաջարդ կատարվեց գործող քաղաքապետի օրոք , եւ այդ աշխատանքը «փայլուն» կատարելու համար Սուրեն Ստեփանյանը «պարգեւատրվեց» կոմունալի պետի պաշտոնով:
-Դեմ եմ հացենին, լորենին, թխկին կտրելուն, իսկ 24 մետրանոց բարդիները պիտի կտրել, նույնիսկ` քոքից: Շենքերի շրջակայքը բարդու տեղը չի: Այն կարելի է տնկել գետի ափերին, ճանապարհների եզրին:
-Այս օրերին ֆինանսական չարաշահումների համար ստուգումներ են կատարվում Սիսիանի քաղաքապետարանում: Որպես ավագանու անդամ, որպես փորձառու եւ ֆինանսներից գիտակ մարդ, որպես, ի վերջո, Սիսիանի բնակիչ, Ձեզ չե՞ն հետաքրքրում այդ ստուգումները:
– Հետաքրքրվել եմ: Քաղաքապետարանում նախկինում ստուգումներ արվել են, հիմա լրացուցիչ ստուգումներ են արվում: Ցանկացել եմ իմանալ արդյունքները, ասել են, որ դրանք աշխատակազմում են եւ կարող եմ այնտեղ ծանոթանալ: Անձամբ ես հետաքրքրված եմ եւ կծանոթանամ: Բայց եթե կա ստուգող կազմակերպություն, ինքը պիտի բարի լինի այդ ստուգումները նորմալ կատարել, որովհետեւ ինքը պիտի պատասխան տա իր ստուգումների արդյունքների համար: Իսկ եթե մեկը խախտում թույլ տա ստուգելիս, ես դա չեմ հասկանա, որովհետեւ իմ պրակտիկայում նման բան չի եղել:
-Քաղաքապետը ազդեցիկ որոշ շրջանակներում ասել է, որ, իբր, այդ ստուգումները անօրինական  են: Սիսիանի ավագանու անդամները ինչո՞ւ են հանդուրժում նման «անօրինական ստուգումները» համայնքապետարանում:
-Ես նման բան չեմ լսել, բայց եթե դուք լսել եք… Նախ` անօրինական ստուգում չի լինում, որովհետեւ քաղաքապետը չի որոշում` ստուգումը անօրինական է, թե` ոչ: Մարզպետարանն իր հերթական ստուգումն է անում,  անօրինականը որ՞ն է:
-Որպես ավագանու անդամ` Ձեր առաջին ըմբոստությունը  մեծ հնչեղություն ունեցավ: Դուք պնդել էիք, որ քաղաքապետի տեղակալը իրավասություն չունի նիստ հրավիրել եւ վարել, ինչը որ տեղի էր ունեցել, եւ հետեւողականորեն հասաք մինչեւ ԱԺ` խնդիրը պարզաբանելու համար:
-Հիմա էլ նույն կարծիքին եմ, որ նա չուներ այդ իրավունքը, քանի որ ՏԻՄ օրենքը նախատեսում է, որ նիստերը վարում է միայն քաղաքապետը: Նրա բացակայության դեպքում  նրա ֆունկցիաները կարող է կատարել տեղակալը` համապատասխան հրամանով միայն: Իսկ հրամանը չէր տրվել:
-Ձեր կարծիքը Սիսիանի քաղաքապետարանի կրթության եւ մշակույթի բաժինը փակելու մասին:
-Այդ հարցը ինձ չպիտի տաք: Բանն այն է, որ դա կատարել է նախկին ավագանին, ով  իրավունք չուներ կառուցվածքային փոփոխություններ կատարել: Նրանք են հաստատել այդ որոշումը, թող նրանք էլ պատասխան տան: Օրենքն ասում է, որ կառուցվածքային փոփոխությունները պիտի նորընտիր ավագանին հաստատի`  համայնքապետի պաշտոնավարման 20 օրվա ընթացքում: Բայց մինչեւ նոր իշխանության պաշտոնակալումը այդ փոփոխությունն  արդեն արվել էր:
-Պարոն Բաբայան, Չարենցի փողոցի բնակիչները 2 տարի է` պայքարում են իրենց շենքի դիամացի կանաչ տարածքը գարաժներ դարձնելու` դարձյալ նախորդ ավագանու օրոք ընդունված որոշման դեմ, սակայն ներկա ավագանու անդամներից որեւէ մեկը նրանց խնդրով չի մտահոգվում:
-Եկեք օրինակով խոսեմ. երբ Սարգսյանի ժամանակ Բայաթյան Ժորան նշանակվեց քաղաքաշինության բաժնի պետ, բերեցին-դրեցին Գառնիկ Հովակիմյանի պաշտոնավարման ժամանակվա մի շարք որոշումներ չեղյալ համարեցին: Ես այն ժամանակ էլ եմ դրան դեմ  քվեարկել, որովհետեւ դա անօրինական քայլ էր: Լավրենտն էլ, դե, բելել էին-ստորագրել էր: Նմա բան չէր կարելի:
Չարենցի փողոցի բնակիչները միայն դատարանով կարող են վիճարկել իրենց իրավունքները:
– Ամիսներ առաջ «Մեծահասակների կրթության կենտրոն» ստեղծելու նպատակով Սիսիանի քաղաքային համայնքին հատկացվել է դրամաշնորհ: Ի՞նչ աշխատանքներ են կատարվել այդ ուղղությամբ:
-ՄՊՍԿ-ի առաջին հարկում տարածք ենք հատկացրել: Ես հետեւողական եմ լինելու, թե ինչ կրթական ծրագիր է իրականացվելու:
-Լավ, պարոն Բաբայան, կարծում եմ` երիտասարդները ձեզ հետ միեւնույն ավագանու կազմում աշխատելով` արդեն իսկ շատ բան կարող են սովորել ձեզանից, եւ դուք նրանց համար կարող եք նաեւ օրինակ լինել:
-Տեսեք, եթե մի հարց ենք քննարկում, որը մեր սրտով չի, Աղայան Կիմի տղան հո դեմ չի՞ քվեարկելու, Արան, ով Աղասու խնամին է, հո դեմ չի՞ քվեարկելու: Այդպես` մի 10-12 հոգի, ովքեր քաղաքապետի հովանավորությամբ են ավագանի դարձել: Ես այնքան էլ գոհ չեմ իմ աշխատանքից, քանի որ մեկ կամ երկու մարդու դեմ քվեարկելը դեռեւս որոշիչ չէ: Բայց խիղճս հանգիստ է, որովհետեւ ակտիվ եմ, սրտացավ:
Այն, ինչ որ վատ է Սիսիանի համար, իմացեք, որ վատ է նաեւ ինձ համար:

Զրույցը վարեց Արեւհատ ԱՄԻՐՅԱՆԸ
17.05.2013

Մեկ Արձագանքման ԱՅՆ, ԻՆՉ ՎԱՏ Է ՍԻՍԻԱՆԻ ՀԱՄԱՐ, ԻՄԱՑԵՔ, ՈՐ ՎԱՏ Է ՆԱԵՎ ԻՆՁ ՀԱՄԱՐ համար

  1. Արա Խաչատրյան says:

    Հարգելի պարոն Բաբայան, ես չգիտեմ, թե ով ինչպես է ընտրվել կամ վերընտրվել ու անցել համայնքի ավագանու շարքերը, բայց մի բան լավ գիտեմ, որ ինչ էլ գիտեմ, իմ մեջ եմ պահում եւ չեմ հրապարակայնացնում… Ասեմ ավելին, ես իմ քվեն ստացել եմ համայնքիս այն քաղաքացիների շնորհիվ, որոնք վաղուց ճանաչում են ինձ ու իմ կարողությունները տարբեր ոլորտներում, իսկ հովանավորի հարցով չարաչար սխալվում եք: Ես երիտասարդ եմ եւ ունեմ իմ աշխատաոճը եւ իմ սկզբունքները, իսկ մեջբերումը ձեր կողմից ավելորդ էր:
    Աշխատում եմ լուռ, որովհետեւ այդպես եմ դաստիարակվել, ես հայրենասերի որդի եմ եւ ինքս էլ երիտասարդ երկրապահ, վարձատրվող աշխատանքս թողնելով` ես տրամադրվել եմ անվճար հասարակական գործունեությանը` ժողովրդավարությանը: Դեռ աշխատելու շատ ժամանակ ունենք…

Ավելացնել կարծիք

Ձեր էլփոստի հասցեն չի հրապարակվելու: Պահանջվող դաշտերը նշված են *