ԱՅՍՕՐ ԱԶԱՏ ԽՈՍՔԻ ԵՎ ՄԱՄՈՒԼԻ ԱԶԱՏՈՒԹՅԱՆ ՄԻՋԱԶԳԱՅԻՆ ՕՐՆ Է

Ազատ խոսքի գինը եւ արժեքը միայն ազատ միտք, անկաշկանդ գրիչ ունեցող մարդը կհասկանա:
Սակայն նրա վրա բռնացող, այն ճնշող մարդն էլ  է հասկանում` հենց նրա վրա բռնություն գործադրելու չափով:
Որքան էլ կեղծիք ու սուտ  հրամցվի,  ճշմարտությունը կոծկվի, քողարկվի…միեւնույն է, մախաթը պարկում երկար չի մնա:
Մարդու իրավունքների պաշտպան Կարեն Անդրեասյանը շնորհավորել է լրագրողներին մամուլի ազատության միջզգային օրվա կապակցությամբ իր ֆեյսբուքյան էջում գրելով`
Այսօր լրագրողներին մաղթում եմ ազատվել 6 չարիքից
Մայիսի 3-ը արտահայտվելու, խոսքի, մամուլի ազատության միջազգային օրն է: Խոսքի ազատությունը (արդար դատաքննության իրավունքի հետ զուգահեռ) ապահովում է բոլոր մյուս իրավունքների պաշտպանությունը և հանդիսանում ժողովրդավարության կառուցման անկյունաքարը: Դրա համար լրագրողն իր գործում պիտի ազատ լինի խմբագրից ու նրա անհարկի միջամտությունից: Խմբագիրը պետք է ազատ լինի լրատվամիջոցի սեփականատիրոջ գրաքննությունից: Իսկ լրատվամիջոցի սեփականատերը պետք է ազատ լինի գովազդային շուկայի ճնշումից:
Իսկապես որ, Հայաստանում խոսքի ազատության վիճակը էականորեն բարելավվել է վերջին տարիներին: Պետության և պետական մարմինների միջամտությունը զանգվածային լրատվության միջոցների գործունեությանը հասցվել է հնարավոր ու միջազգայնորեն թույլատրելի նվազագույնին: Սակայն այսօր մեր տարբեր շուկաների, այդ թվում՝ լրատվական շուկայի գերկենտրոնացումը հնարավորություն չի տալիս լրագրողին, խմբագրին, լրատվամիջոցի փոքր և միջին սեփականատերերին լինել տնտեսապես ազատ, ապահովված ու պաշտպանված:

Բոլոր լրագրողներին և լրատվամիջոցներին մաղթում եմ լիարժեք ազատություն
1. լրատվական շուկայի գերկենտրոնացումից կամ մենաշնորհայնացումից,
2. թաղային հեղինակությունների և այլ հանցագործների բռնարարքներից,
3. օլիգարխներից և այլ հարուստներից նրանց ֆինանսական կախվածությունից,
4. լրատվամիջոցների կուսակցականացումից,
5. պատվերով հոդված գրող և դրանով իսկ ազատ խոսքը վարկաբեկող ու այլասերող լրագրողից,
6. դատարանի ապօրինի վճիռներից:

Մարդու իրավունքների պաշտպան Կարեն Անդրեասյանի գրառումը
03.05.2013

Ավելացնել կարծիք

Ձեր էլփոստի հասցեն չի հրապարակվելու: Պահանջվող դաշտերը նշված են *