ՏՆՏԵՍՈՒԹՅՈՒՆ ԿԱՌՈՒՑԵԼՆ ԱՎԵԼԻ ՀԵՇՏ Է, ՔԱՆ՝ ԱՐԴԱՐՈՒԹՅՈՒՆԸ ՎԵՐԱԿԱՆԳՆԵԼԸ

Հարցազրույց թիվ 12 ընտրատարածքում ՀՅԴ վարկանիշային ցուցակով առաջադրված ԱԺ պատգամավորի թեկնածու ՎԱՐԴԱՆ ՖԵՐԴԻՆԱՆՏԻ ԳԵՎՈՐԳՅԱՆԻ հետ

-Թիվ 12 ընտրատարածքում վարկանիշային ընտրակարգով ՀՅԴ-ն առաջադրել է սիսիանցի երկու թեկնածու, երկուսն էլ՝ հարգված, ընդունված, ճանաչված մարդիկ, ընդ որում՝ Արտակ Սարգսյանը համապետական ընտրացուցակում 11-րդ տեղում է, այսինքն՝ անցողիկ: Որպես համակուսակից՝ դուք նաեւ միմյանց դե՞մ եք պայքարում:

-Բնավ՝ ոչ: Բացի նրանից, որ մենք կուսակից ընկերներ ենք, մենք նաեւ ընկերներ ենք, եւ մեր նպատակը նույնն է: Մենք ներկայացնում ենք դաշնակցության գաղափարախոսությունը, ծրագիրը եւ միասին աշխատում ենք քվե բերել կուսակցությանը: Այս ընտրատարածքում մեր կուսակցությունը ներկայանում է մեզանով, մեր դեմքով, ինչն էլ կրկնակի պատասխանատվություն է մեզանից յուրաքանչյուրի համար:

-Ինչո՞վ ես պայմանավորում թիվ 12 ընտրատարածքի՝ ՀՅԴ վարկանիշային ցուցակում քո թեկնածության առաջադրումը:

-Երբեք չեմ մտածել, որ կարող եմ պատգամավորի թեկնածու լինել,17103271_398586853839256_182267316136483990_n բայց երբ բարեփոխված սահմանադրությունը հնարավորեց ընտացուցակների՝ վարկանիշային ձեւը, իմ կուսակցությունը եւ ընկերները նպատակահարմար գտան այս ընտրատարածքում առաջադրել իմ թեկնածությունը՝ հաշվի առնելով իմ՝ տեղացի լինելը, իմ՝ այստեղ ապրած կյանքը, իմ հեղինակությունը, իմ անցած ճանապարհը, որը, հուսով եմ, չի ամաչեցնում եւ կարող եմ բացճակատ ներկայացնել եւ կուսակցությանը, եւ՝ ինքս ներկայանալ:

-Թեեւ, ինչպես ասում են, ուղն ու ծուծով սիսիանցի ես, բայց՝ ներկա պահին Սիսիանում չես ապրում, դա չի՞ խորթացրել, օտարացրել Սիսիանից:

-Գուցե՝ հեռացել եմ տարածությամբ, բայց ոչ խորթացել եմ, ոչ էլ՝ օտարացել, շփումս չի ընդհատվել: Հնարավոր է, չէ՞, ապրել այստեղ, բայց «դուրս լինել» այստեղից: Իմ կենսակերպով, զգացողություններով, ընկալումներով ես նույն սիսիանցին եմ: Էդպիսի օր չկա, որ իմ աշխատանքում, իմ շփումներում, իմ առօրյայում, իմ հարաբերություններում Սիսիան եւ սիսիանացի չլինի: Իմ աշխատողների 90 %-ը սիսիանցիներ են, ես խոսում եմ Սիսիանի բարբառով, միմյանց հետ շփվում ենք սիսիանյան նիստ ու կացով: Ինձ երբեք դուրս չեմ դրել սիսիանյան միջավայրից, եթե բոլորի ուրախություններին ներկա չեմ եղել, տխրություններին հաստատ ներկա եմ: Ի վերջո՝ այստեղ է տարիներով ձեւավորված իմ ընկերությունը, բարեկամությունը, հարազատությունը: Այստեղ է իմ ապրած կյանքի մաքուր, բյուրեղյա հիշողությունը, կենսագրությունը, որը միշտ ներկա է, ինձ հետ է, իմ մեջ է, որով էլ ապրում եւ հպարտանում եմ:

-Դու դաշնակցության առաջին անդամներից ես Սիսիանում, արցախյան պատերազմի առաջին օրերից Սիսիանի կամավորական ջոկատների հետ գնացիր մարտադաշտ, քեզ դուրս չդրեցիր նաեւ ապրիլյան քառօրյայից: Դա քո կուսակցակա՞ն պարտքն ես համարել, մարդկայի՞ն, ազգայի՞ն, քաղաքացիակա՞ն…

-Անհամեստություն չանեմ՝ բոլորը միասին: Եթե դաշնակցական չլինեի, դարձյալ մասնակցելու էի ազատամարտին, բայց քանի որ դաշնակցությունը մեծ մասնակցություն է ունեցել Արցախի ազատագրմանը, ես էլ, որպես գաղափարի զինվոր, պայքարի մարտիկ, այդ ուժի հետ պիտի գնայի մարտադաշտ:

-Շատերը Վարդան Գեւորգյան անհատին ՀՅԴ կուսակցությունից դուրս են ընկալում, գնահատում, ընդունում: Վարդան Գեւորգյան անհատը տարբերվո՞ւմ է Վարդան Գեւորգյան կուսակցականից:

– Ես քնում եմ որպես դաշնակցական, արթնանում եմ որպես դաշնակցական: Առավոտյան ուրիշ մարդ չեմ, աշխատանքից հետո՝ ուրիշ: Դաշնակցական լինելը ինձ համար առօրյա է, կենսակերպ, եւ Վարդան Գեւորգյան անհատը բացառապես չի տարբերվում Վարդան Գեւորգյան դաշնակցականից: Իսկ թե ինչու են այդպես մտածում, դժվարանում եմ պատասխանել:

-Դու նախընտրական հանդիպումներ ես ունենում, մարդիկ որքանո՞վ են հետաքրքրված ԱԺ ընտրություններով: Ի՞նչ խնդիրներ են բարձրացնում, ի՞նչն է այսօր առավելապես մտահոգում շարքային ընտրողին, մարդուն, քաղաքացուն:

-Ասեմ ցավալին՝ բացարձակապես՝ ոչինչ: Գիտակից եւ ինտելեկտուալ շերտը հանած, եւ դա մեծ ցավով եմ ասում, ժողովրդի մեծամասնության համար ամեն ինչի հիմքում դրվել է փողը: Եթե նախորդ ընտրությունների ժամանակ այդ մասին խոսում էին գաղտնի, ինչ որ տեղ՝ ամ16999200_397404973957444_3816386278004220925_nաչելով, այսօր խոսվում է բացահայտ, բարձրաձայն. քվեն հանված է աճուրդի, վաճառքի: Ինձ համար ամենացավալի եւ ամենատխրեցնող թեման, որ ամաչում եմ նույնիսկ խոսել այդ մասին, այն է, որ մարդը դեմքիդ նայում եւ ասում է՝ ես վաճառում եմ իմ ձայնը: Նախորդ բոլոր ընտրությունները ձեւավորել են ընտրողի՝ վաճառվելու ամոթալի հոգեբանությունը: Որեւէ մեկին բացարձակապես չի հետաքրքրում ոչ մի դաշինքի, ոչ մի կուսակցության ու քաղաքական ուժի ծրագիր: Նաեւ՝ դաշնակցության: Դա, իհարկե, իր պատճառներն ունի. նախկին ընտրությունները, ընտրական նախկին համակարգը որեւէ վստահություն չի ներշնչում: Ամեն անգամ ընտրողը հուսախաբվելով հասել է նրան, որ մտածում է՝ այսօր ինչից օգտվեմ, դա է իմ «քյարը»:

-Զրույցներից մեկի ժամանակ ասացիր, որ իրականացնելու ես քաղաքակիրթ ընտրապայքար, քանի որ ընտրությունները մեզանում եւ ձեւափոխվել, եւ՝ իմաստափոխվել են: Ո՞րն է քաղաքակիրթ ընտրապայքարի քո ձեւը:

Դա ամենապարզ, սովորական ընտրապայքարն է՝ քարոզրություն: Քանի որ ֆիզիկապես հնարավոր չէ հանդիպում ունենալ բոլոր ընտրողների հետ, օգտվում եմ նաեւ սոցցանցերի հնարավորությունից, ներկայացնում եմ իմ տեսակետներն ու պատկերացումները, ծրագրերը, ամենակարեւորը՝ բացառելով փողը: Ես համոզված եմ, որ հաջողություն ունենալու եմ, կարողանալու եմ սիսիանցիներին ասել, որ հնարավոր է առանց ընտրակաշառքի հաջողություն ունենալ՝ պարզապես ցույց տալով քո աշխատանքի արդյունքում քո տեսակը:

-ՀՅԴ-ն իրեն համարում է գաղափարական կուսակցություն: Հավատո՞ւմ ես այսօր հանուն գաղափարի եւ հանուն կուսակցության ծրագրի քվե ստանալուն:

-Դժվար հարց է: Չգիտեմ ինչու՝ ժողովուրդը վստահություն չունի նաեւ դաշնակցության նկատմամբ, բայց կարող եմ ընդամենն ասել շատ կարեւոր մի բան. 27 տարի է՝ դաշնակցությունը Հայաստանում է, եւ 27 տարի խոսում է 3 հիմնական կետերի մասին՝ արդարություն, Արցախի վերջնական ազատագրում եւ Հայաստանի արժանի տեղի ու դերի ապահովում միջազգային ասպարեզում: Արցախի ազատագրման հարցում դաշնակցությունը եղել է առաջին տեղերում, եթե ոչ՝ առաջին, Հայաստանի՝ միջազգայնորեն ճանաչման հարցը եւս դաշնակցության ամենօրյա գործն է՝ հայ դատի ճանաչում, հայ դատի գրասենյակներ եւ այլն… Երրորդ կարեւոր խնդիրը Հայաստանում արդարության հաստատման խնդիրն է, որը դեռեւս մնում է գերխնդիր: Մենք պայքարում ենք Հայաստանում արդարության հաստատման համար, բայց երբ ժողովուրդն ընդամենը 5 % վստահության քվե է տալիս, մեզանից պահանջում է 50 %-ի պատասխանատվություն: Մենք, իհարկե, շատ ավելին ենք անում, բայց արդարություն հաստատելու համար քաղաքական ավելի լայն հնարավորություններ են անհրաժեշտ:

-Իսկ չե՞ք փորձել ինքներդ ձեզ համար վերլուծել, գտնել, պարզել այն պատճառները, թե ինչու դաշնակցությանն ավելի շատ չեն վստահում:

-Իհարկե, մենք մեր սխալներն ունենք, ինչպես բոլորն ունեն: Բայց մենք մեր սխալները գիտակցելով՝ փորձում ենք ուղղել, փորձում ենք ներկայացնել մեր ծրագրերը, մեր տեսակը եւ ժողովրդի վստահությունը շահել: Բայց այս պայմաններում, երբ ուժային լծակները, փողային լծակները ամեն կերպ իշխում են գաղափարին, դա այնքան էլ հեշտ չէ:16998915_396986010666007_7781109799330985815_n

-Բայց ՀՅԴ-ն հիմնականում եղել է իշխող կոալիցիայի մեջ, եւ կրում է այսօր երկրում առակա սոցիալական, տնտեսական, քաղաքական, բարոյա-հոգեբանական վիճակի պատասխանատվությունը:

-Պատասխանատվություն կրում ենք բոլորս: Այսօր առիթ է եւ հնարավորություն այդ պատասխանատվությունը վստահել ճիշտ քաղաքական ուժի, ազնիվ քաղաքական գործչի: Ընտրող ջան, այսօր այս պատասխանատու պահին դու հնարավորություն ունես ընտրել այն կուսակցությանը, որին ուզում ես վստահել առաջիկա 5 տարում երկրի կառավարումը: Վստահիր եւ պահանջիր: Պատասխանատվությունից խուսափելուց, այն քեզանից գցելուց հետո այլեւս դաշնակցությունից պահանջելու իրավունք չունես: Մինչդեռ՝ դաշնակցությունն ունի այդ պատասխանատվությունը կրելու եւ հնարավորությունը, եւ ցանկությունը, եւ կամքը: Այդ ամենը գիտակցելով՝ մենք տանում ենք եւ «թուք ու մուրը», եւ ամոթը, որովհետեւ երկիրն այս վիճակից հանելու ուրիշ ձեւ չենք տեսնում: Մենք մարտիմեկյան դեպքերը բացառում ենք, մենք արյունահեղությունը բացառում ենք: Մենք ամեն տեղ եղել ենք ամենածայրահեղ ընդդիմությունը, հացադուլ էլ ենք արել, նստացույցեր էլ, միտինգներ էլ, բողոքներ էլ, բանտերում էլ ենք եղել, բայց համոզվել ենք, որ ամենաճիշտ պայքարի ձեւը քաղաքակիրթ պայքարն է, որ կարող ենք լինել իշխանության կազմում եւ հնարավորինս լուծել երկրի սոցիալ-տնտեսական, արտաքին, ներքին քաղաքական խնդիրները: Մենք համոզված ենք, որ ընտրությամբ հնարավոր է իշխանափոխություն: Ընտրական այն համակարգը, որին այսօր հասել ենք, թեեւ իդեալական չէ, բայց առաջընթաց է, եւ դաշնակցության համառ պայքարի արդյունքում է ընդունվել: Վարկանիշային ընտրակարգը մեր պատկերացրածը չէր, բայց համոզված եմ՝ հաջորդ ընտրություններն ամբողջությամբ լինելու են համամասնական ընտրակարգով:

-Ընտրողը լավ է ճանաչում վարկանիշային ցուցակներում ընդգրկված թեկնածուներին, ովքեր ապրել եւ ապրում են իր աչքի առաջ: Յուրաքանչյուրի լավագույն քարոզիչը նրա ապրած կյանքն է, անցած ճանապարհը, կերտած կենսագրությունը: Քո ապրած կյանքը եւ անցած ճանապարհը ի՞նչ են ասում քո մասին:

-Թեկնածուներից ոմանք 27 տարի մի ընտրությունից գնում են էն մի ընտրություն, էն ընտրությունից հետո էլ մյուս ընտրություն, եւ իրենց ողջ կյանքում մասնագիտացել են էդ գործի մեջ, ու էնքան պրոֆեսիոնալ են դարձել, որ կարծես դա իրենց մասնագիտությունն է: Որոշ թեկնածուներ էնքան համոզիչ են ամեն անգամ խաբում ընտրողին, որ ընտրողը, գիտակցելով, որ էլի խաբվելու է, իր քվեն դարձյալ տալիս է նրան: Եզրակացությունը թող ընտրողն անի:

-Այսօրվա քաղաքական դաշտը շատ է ապաքաղաքական, մեծ համարձակություն չէ՞ մաքուր կենսագրությամբ, չարատավորված անունով ու նկարագրով հայտնվել այդ դաշտում:

-Համարձակություն է, բայց վստահ եմ, որ նույն ոճով գնալու եմ, եւ ոչինչ չի արատավորելու իմ անունը: Համոզված եմ, որ այս ընտրությունը լինելու է օրինակ, հավաստիացնելու, որ կարելի է կեղտոտված քաղաքական դաշտում նաեւ մաքուր ընտրություններ անել:

-Քո կուսակցության եւ քո կարգախոսն է՝ Նոր սկիզբ, Արդար Հայաստան: Երբ 27 տարի առաջ դաշնակցությունը եկավ Հայաստան, դարձյալ նոր սկիզբ էր քարոզում…

-Ամեն օր նոր սկիզբ է գաղափարախոսության մեջ: Ամեն օր: Եթե այսօր դա հաջողվի, վաղը մենք մեկ ուրիշ ծրագիր ենք ունենալու՝ նոր սկզբով: Բայց քանի որ մենք անհավանական լճացել ենք, նոր սկիզբով, նոր թափով ուզում ենք վերականգնել արդարությունը: Անձի փոփոխությունը որեւէ բան չի տալու, մենք դրանում վաղուց համոզվել ենք: Չեմ ուզում փնովել որեւէ մեկին, բայց եթե որեւէ կուսակցության առաջնորդ չլինի, այդ կուսակցությունը քանդվելու է: Դաշնակցությունը նման խնդիր չունի: Մենք սկզբունքորեն հասկանում ենք, որ համակարգային փոփոխություն է պետք, ձգտում ենք դրան եւ արդարության վերականգնմանը: Կուսակցության՝ Նոր սկիզբ, Արդար Հայաստան կարգախոսին իմ կողմից ավելացնում եմ նաեւ արդար Սյունիք՝ ողջ երկրում արդարությունը վերականգնելու դժվարին գործընթացում կարեւորելով մասնավորաբար Սյունիքի դերը:

-Երբ ընտրությունը քաղաքական պայքարից  վերածվել է հնարավորությունների եւ ռեսուրսների պայքարի, դու կարծում ես, որ այս 20-25 օրում հնարավո՞ր է փոխել ընտրողի կարծրացած վերաբերմունքը ընտրությունների նկատմամբ:

-Մենք խնդիր ունենք արդարության վերականգնման, որովհետեւ ժողովուրդը չի վստահում ոչ մեկին, նաեւ՝ մեզ, ու բոլորին: Երբ չկա վստահություն, ամենամեծ խնդիրը դառնում է արդարության վերականգնումը: Երբ վերականգնվի արդարությունը եւ վստահություն ձեւավորվի, մենք ազգովի քարը քարին կդնենք, եւ շատ արագ տնտեսությունը կվերականգնվի: Տնտեսություն կառուցելն ավելի հեշտ է, քան՝ արդարությունը վերականգնելը:

R

Զրույցը՝ Արեւհատ ԱՄԻՐՅԱՆԻ

 

Ավելացնել կարծիք

Ձեր էլփոստի հասցեն չի հրապարակվելու: Պահանջվող դաշտերը նշված են *